தேங்காய் துவையல்

தேங்காய் துவையல்

தேவையான பொருட்கள்:

தேங்காய் துருவல் ஒரு மூடி,

(முற்றிய தேங்காய் நல்ல சுவையாக இருக்கும்.) 

புளி அரை நெல்லிக்காய் அளவு,

பெருங்காயம் ஒரு சிட்டிகை,

சிவப்புமிளகாய் (வற்றல்) 12,

உருட்டு உளுந்து ஒரு தேக்கரண்டி,

கடுகு ஒரு தேக்கரண்டி,

கருவேப்பிலை இரண்டு ஈர்க்கு,

உப்பு.

செய்முறை: மிளகாய்,உளுந்து, கடுகு ஆகியவற்றை தனித்தனியாக வறுத்துக்கொள்ளவும். பிறகு, தேங்காய் துருவல், புளி,பெருங்காயம் கருவேப்பிலை, உப்பு இவற்றுடன் சேர்த்து மிக்ஸியில் குறைவாக தண்ணீர் சேர்த்து கெட்டியாகவும் நைஸ்ஸாகவும் அரைத்து எடுத்து வைத்துக்கொள்ளவும்.

இந்த துவையல் இட்லி, தோசை, சப்பாத்தி,  புளி சாதம்,  எலுமிச்சை சாதம், தயிர்சாதம்,  தேங்காய் சாதம் ஆகியவற்றிற்கு தொட்டுச்சாப்பிட மிகவும் ருசியாகவும் இருக்கும். இடியாப்பத்திற்கும் சேர்த்து பிசைந்து சாப்பிட ஏற்றது. இரண்டு நாட்கள் வரை கெடாது. வெளியூர் செல்லும் போது மேலே குறிப்பிட்ட அனைத்து உணவிற்கும் தொட்டு சாப்பிட தனியாக பார்சல் செய்து எடுத்துச்செல்லலாம் கெட்டுப்போகமல் இருக்கும்.

தேங்காயயையும் வறுத்து சேர்த்து அரைக்கலாம். சிலர் இதை விரும்பக்கூடும்.

 இதில் இனிப்பு,புளிப்பு,காரம்,உப்பு என நான்கு வகையான சுவையும் கலந்து இருப்பதால் மிக சுவையாக இருக்கும்.

மணக்கும் குருமா

சப்பாத்திக்கு தொட்டுக்கலாம்ல...

சைவக்குருமா:

 

தேவையான பொருள்கள்:

தேங்காய் ஒரு மூடி துறுவியது,

பொட்டுக்கடலை ஒரு கைஅளவு,

பச்சைமிளகாய் 4,

இஞ்சிபூண்டு நறுக்கியது ஒருதேக்கரண்டி

சோம்பு 1 தேக்கரண்டி

இந்த ஐந்து பொருள்களையும் மிக்ஸியில் நன்கு அரைத்துக் கொள்ளவும்.

பெரியவெங்காயம் 3, தக்காளி 4 நறுக்கி வைத்துக்கொள்ளவும்.

கடையில் விற்கும் குருமாமசாலா பவுடர் இரண்டு தேக்கரண்டி,

மற்றும் கிராம்பு 2, பட்டை  ஒரு சிறுதுண்டு,  ஏலம் 2,

விருப்பம் இருந்தால் முந்திரி பருப்பு 4,

எண்ணெய் 4 தேக்கரண்டி, உப்பு.

 

முதலில் வாணலியில்  எண்ணெய் விட்டு கிராம்பு, பட்டை, ஏலம், முந்திரி போட்டு வறுத்து,

வெங்காயம் தக்காளி சேர்த்து வதக்கி

அரைத்து வைத்துள்ள மசாலாவையும் சேர்த்து வதக்கி

தேவையான அளவு உப்பு போட்டு

மூன்று டம்ளர் நீர் விட்டு

இரண்டு தேக்கரண்டிமசாலாதூள் சேர்த்து

நன்கு கொதி வந்தவுடன் இறக்கவும்.

அதிக சுவை விரும்புபவர்கள் மசாலா சேர்த்து கொதிவரும்போது ஒரு டம்ளர்  தேங்காய் பால் சேர்த்து இறக்கலாம்.

இதில் வேகவைத்த காலிப்ளவர் சேர்த்து கொதிக்கவைத்து இறக்கினாலும் நன்றாக இருக்கும்.

இதை சப்பாத்தி, பூரியுடன் சேர்த்து சாப்பிட மிக சுவையாக இருக்கும்.

பூரிக்கு கிழங்கு தொட்டு சாப்பிடபிடிக்காதவர்கள் இந்த குருமாவை வேண்டாம் என கூறவே மாட்டார்கள்.

வயதானவர்கள் பூரியை இந்த குருமாவில் ஊறவைத்து சாப்பிடுவதை மிகவும் விரும்புவார்கள்.

பட்டை கிராம்பு இல்லாமலும் இதை தயாரிக்கலாம்.

 

காலிஃப்ளவர் மசால்தோசை

காலிஃப்ளவர் மசால் தோசை:

 

தேவையானவை:

காலிப்ளவர்  - 1,

சீரகம் - 1 தேக்கரண்டி,

இஞ்சிபூண்டு அரைத்து - 1 தேக்கரண்டி

பச்சைமிளகாய் - 3,

பெரியவெங்காயம் - 4,

தக்காளி - 3,

எண்ணெய் 3 தேக்கரண்டி,

மஞ்சள் தூள் 1 தேக்கரண்டி

மிளகாய்த்தூள் 3 தேக்கரண்டி,

மல்லித்தூள் 3 தேக்கரண்டி

 

செய்முறை: முதலில் காலிஃப்ளவரை தூண்டுகளாக்கி சுடு நீரில் போட்டு நன்றாக அலசி சிறிது மஞ்சள்தூள், சிறிது உப்புத்தூள் போட்டு கலந்து பின் நன்கு வேகவிடவும்.(சில காலிப்ளவரில்  புழு இருக்கும் அதனால்  சுடு நீரில் அலசிய பின் வேகவைக்கவேண்டும்)

பிறகு வாணலியில் 3 தேக்கரண்டி எண்ணெய் விட்டு சூடு எறியதும் 1 தேக்கரண்டி சீரகம்,  பின் இஞ்சிபூண்டு அரைத்தது,  பின் பச்சைமிளகாய் 3 நறுக்கியது,  அத்துடன் பெரியவெங்காயம் தக்காளி நறுக்கியது போட்டு நன்கு கிளறி பின்னர் வேகவைத்த காலிப்ளவர் தூண்டுகளை சேர்த்து மஞ்சள்தூள், மிளகாய்தூள், மல்லித்தூள், உப்பு தேவையான அளவு போட்டு சிறிது நீர் விட்டு நன்கு கிளறி வேகவைத்து இறக்கவும்.  சூடான சுவையான காலிப்ளவர் மசால் ரெடி. 

இதை தோசையின் உள்ளே வைத்து காலிஃப்ளவர் மசால் தோசையாக வார்த்து கொடுக்கலாம். குழந்தைகளுக்கு ஏற்ற உணவு. சப்பாத்திக்கும் தொட்டு சாப்பிடலாம்.